女女近呢幾個月好似快速成長咁, 講多咗好多野, 雖然佢本身都係口水妹一名, 細D既時間佢都成日伊伊吔吔架喇, 聽見大人傾計又想搭嗲咁款, 不過近排除咗講單字外, 有時都會講D有意思既兩字句子。噚日女女打敗仗, 咳同有鼻水, 所以攞咗一日大假帶女睇醫生, 23個月體重先得10.2KG, 身高84CM, um....... 好似頗輕咁, 不過算啦, 健康咪得囉 ^ ^
大小肌肉方面: 近排好鐘意上落樓梯, 又上又落咁, 星期日更嘗試自己玩公園既滑梯 。
飲食方面: 星期六第一次出足全日街, 嘗試跟足大人既食飯時間同埋以大人食物(淡味)代替bb餐, 夜晚回家先再飲返支奶。
因為考唔到PN, 所以繼續返住每星期2日PLAYGROUP 先, 自己獨自上堂1.5個鐘, 見女女都好開心!! 黎梗10月至11月會去幾間幼稚園面試, 不過我都係報屋企附近既邨校, 應該唔會好難入啩, 希望有間老師同嬸嬸有愛心, 可以開開心心唔谷學術既學校收啦, 等佢有個快樂既童年嘛!! 學卷學校應該都唔會谷既!! 我唔想女女咁快執筆寫字, 上網做過吓研究, 應該K2先開始學寫字先係 HAPPY SCHOOL!!
2014年8月4日 星期一
2014年7月16日 星期三
生產歷程
個女都就黎22個月先至記錄返出世當日既狀況係咪遲咗D呢, 唔緊要啦,我襯宜加仲記得, 寫返先…!!
當日如常返工, 飯後下午大約二時半左右去洗手間, 發覺內褲有一毫硬幣咁上下大既血, 當時個心都驚唔知乜事, 好唔好即刻請半天假返黃醫生到檢查, 但又同自己講同打俾老公, 當日係星期一, 因為星期六都會返黃醫生到做產檢, 同埋覺得都唔係好多血, 想睇定D先, 又或者第日先請假啦, 所以就冇請假早走, 之後既幾個鐘都再冇乜點出血, 咁踏正五點半就即刻放工返屋企休息吓!!
幾經轉接, 其實自從有咗個女之後同埋我無時無刻都想嘔, 我已經冇再乘坐穿梭巴士, 因為冇得中途落車, 要去到指定站先可以落車, 所以我轉咗先搭專線小巴再轉地鐡咁上, 下班。返到屋企大概六時半, 係梳化坐下休息瞓吓覺等老公買外買我食, 之前完全食唔到野, 嘔到七彩, 嘔到五個幾六個月!! 人地陀仔肥幾廿磅, 但我就瘦咗十幾磅, 啱啱先話可以食返小小野啫, 典知...!!
去到八點多鐘到食埋飯就去沖涼, 咁就見到條內褲有一滴水漬, 當時傻傻地都唔知身體其實已經有變化, 跟住沖完涼就上床瞓覺, 因為個肚都幾大好贅, 同埋見下午既狀況, 所以就瞓喇, 但其實都係瞓唔著, 純粹休息吓。每半小時就走去厠所檢查吓條內褲, 每次都見到一小滴新鮮既水漬, 去到十二點多鐘, 心諗事態應該唔係咁簡單, 即刻出房同老公講不如入伊利沙佰急証室睇醫生, 因為我都有o係QE做產檢, 但又諗如果要住院, 星期六返黃醫生到驚尷尬, 因為佢寫定信俾我話有乜唔妥, 千奇唔好去政府要即刻返浸會, 因為我一早講咗係開刀生女, 咁同老公商量過後執了小小日用品就搭的士去咗浸會, 諗住應該冇乜野, 好快可以出院, 頂多住一晚, 因為當時係半夜一點幾。
典知去到浸會, 姑娘話我已穿了洋水, 其實八點幾o個第一滴已經係, 係我傻間間唔知咋!! 姑娘打俾黃醫生, 咁黃醫生問咗我既狀況就話生得喇, 不過估計應該冇咁快, 應該可以等到天光, 叫我先上房休息, 同埋吩咐姑娘幫我打定針, 咁我就上咗一間熄晒燈只有走廊打入少少光既房休息喇。間房應該係待產房o個D, 因為仲有兩個媽媽瞓咗o係到, 不過人地係順產既。
因為太夜同埋o係待產房, 所以老公要走, 咁我就吩咐佢打電話俾爸媽先, 跟住返屋企瞓覺, 第日早D過黎陪我。老公離開醫院後, 姑娘首先幫我帶上檢查BB心跳既帶睇吓BB心跳, 確定正常之後就幫我打針, 嘩… 支針打落黎痛到飛起, 我見到支針頭好粗呀, 仲話要六個鐘後再打第二支, 打完後就叫我瞓覺, 姑娘走後我同BB講做乜想咁早出世呀,
係媽媽肚裏面住耐D嘛!! 跟住我就瞓喇, 瞓咗冇耐, 發覺下體好似洪流咁出水, 心知應該係洋水, 即刻拑鐘叫姑娘, 心驚咁快流晒D洋水會唔會影響到女女架, 個時先至兩點幾咋喎, 幾時先等到黃醫生黎呀, 姑娘黎到話冇事, 咁我又再瞓過, 過咗冇耐, 個肚開始痛, 好似來經期咁, 好有規律, 咁梗係又再拑鐘叫姑娘啦, 姑娘檢查後就話俾我知已開咗兩度,
同埋摸到BB頭仔, 我心諗我個B得八個幾月咋喎, 你典會摸到佢個頭仔呀?
唔好玩啦!! 仲話如果再開而黃醫生未黎到前咁我就要自己生… 天呀!! 我俾咁多錢就係唔想自己生, 就係因為怕痛, 你宜加竟然叫我自己生, 如果我可以自己生我就去QE生啦, 幾佰蚊落得樓喇!!
跟住又瞓返, 但又好有規律咁痛醒, 兩度咋, 我已經痛到係咁流眼淚, 同自己講唔洗指意會再生, 仲要開到十度先可以生, 真係唔敢想像會有幾痛, 所以真心偑服能夠忍痛自己生既媽媽。
就係咁痛吓醒吓再久不久拑鐘叫姑娘摧黃醫生快D黎既情況下, 好唔容易捱到天光俾姑娘推上手術室門外等黃醫生。都等咗差不多一個鐘先見到黃醫生, 一見到黃醫生我即刻忍唔住喊話好痛, 佢話唔洗驚, 話麻醉科同兒科醫生已經黎咗, 好快可以幫我攞BB出黎。我同黃醫生講話姑娘叫我自己生同埋BB已頭仔向下, 黃醫生一檢查話係腳仔喎, 呢一刻我慶幸返咗浸會, 如果去咗QE,
都唔知點算, 可能會攪一大輪先幫我開刀, 敢我就死得喇, 我最怕痛 @@
被推入手術室後已見到麻醉科同兒科醫生, 但我老公冇得入黎陪我因為係緊急徵用手術室, 所以唔俾入。
好喇, 麻醉葯開始生效, 本來諗住全程都閉上眼睛既我由於好奇心作祟下同埋麻醉科醫生成日聊我傾計, 所以我就望咗一眼手術台上高高掛住既烏蠅鏡, 我見到我個肚皮佈滿好多鮮血色既血, 跟住我已經唔敢再望第二眼喇!!
時間過咗幾分鐘到, 麻醉科李醫生問黃醫生洗唔洗幫手, 黃醫生話唔好住, BB隻手仔CLICK住咗, 當時我心諗, CLICK咗o係邊到呀, 後來我見到李醫生幫手推咗幾下, 女女就出咗黎喇, 姑娘抱咗女女俾兒科醫生檢查, 陳醫生話女女一切正常, 雖然早產但都有5磅半, 感謝天主!! 當然收水後就會輕返少少。 我問陳醫生點解BB唔喊既, 呢頭講完, 呢頭就聽到女女喊聲喇, 因為姑娘幫佢抺梗身呢, 跟住姑娘抱過黎我到同我講話係女黎架, 仲揪起張被仔俾我睇吓女女既下體, 我心諗我知呀, 千奇唔好俾多抽野我添呀!!
黃醫生好好呀, 佢記得我講過爸爸會陪產, 因為要影相嘛, 但宜加爸爸冇得入黎, 黃醫生竟然用佢自己部手機叫麻醉科李醫生幫我同女女影相再電郵返俾我, 所以我同女女係手術室影既第一張相唔係正式醫院幫我地影, 係出自李醫生既手筆 ^ ^ 如果女女唔係早產, 陀到足月, 我諗應該會有七磅幾八磅喎 ^ ^
影完相後, 女女被抱出去沖涼, 根據爸爸既描述, 姑娘推女女出黎仲停低俾佢影咗幾張相添 ^ ^ 李醫生叫我瞓吓覺, 咁就o係我隻手到打咗一支麻醉針, 當我被推回病房醒返已經係個幾鐘頭既事LU
2014年5月14日 星期三
18 個月
歲半帶返女女去健康院做評估, 姑娘話已完全追返晒出生歲數既行為同認知能力, 以後都唔洗返健康院lu, 要去到四歲先再回來做眼睛評估, 唔知點解, 竟然有點不捨, 不捨係因為呢種routine 既習慣吖, 定係女女咁快就歲半, 已離開嬰兒階段, 踏入幼兒呢@@!!
又黎記錄吓行為, 認知能力同食物方面既野先!!
行為:
踏入18個月, 好似突然長大咗好多, 會嬲人, 會講bb話駁咀鬧返你, 已識得lur地表達不滿~~ 已經好鍾意自己行路, 雖然還要單手或雙手拖住行~~
認知:
識自己著鞋同襪, 當然還沒學識左右之分~~ 知道手手, 腳腳~~ 係協康會返遊戲組, 玩遊戲時識自己分顏色, 其實我都未教佢, 當然還沒學識什麼是紅, 黃, 藍綠色等等~~ 我估女女係覺得/知道/認為顏色有所不同吧~~ 識分蘋果, 橙, 波, 車, 貓, 狗, 傘, 包包, 餅乾, 仲有成日玩電話, 扮大人講電話, 一大推bb話~~ 好貪靚, 幫佢挾髮夾係頭仔, 話靚靚, 佢會好開心, 婆婆話大咗一定好貪靚~~
食物:
牛肉, 蘑菇, 茄子, 粟米仔, 肉豆, 草莓(唔多歡喜), 紅菜頭, 好鍾意飲湯, 魚湯呀, 瘦肉湯呀~~ 我終於發覺我個女唔鍾意食乾爭爭既野, 佢鍾意濕濕地, 唔怪得之我之前煮飯仔俾佢食又或者杰粥,佢都唔多食, 我宜加無論煮通粉仔, 爛飯仔都煮到濕濕地, 例如粟米汁, 蕃茄汁, 南瓜汁, 芝士白汁, 魚湯底, 蕃茄粟米紅蘿蔔湯底咁~~
2014年3月26日 星期三
17個月
終於都識得行路喇..... 不過就要拖住隻手仔, 雙手拖住可以行遠d, 單手拖就行得冇咁遠!! 始終都係早產B, 生理上既所有進度都真係跟返自己既更正年齡(15個半月), 不過媽媽我從來都唔介意妳生理進度慢, 只要每次返健康院同見兒科醫生都話妳及格, 媽媽就OK 架喇~~ 媽媽唔會迫妳讀認字咭, 學數1-10, A, B, C, 讀圖書, 只會隨著妳既意願, 狀況去成長!!
不過從16個月開始起就食少咗野, 每次食粥又或者爛飯都係食得幾口就擰頭仔唔食, 但又不停口食雜糧, 手指餅呀, 生果呀!! 唔通16個月都會有厭食期??!! 俾妳食兩湯匙大人飯加魚肉, 又係食得唔多, 又驚妳咬唔爛, 會胃痛, 因為還沒長大牙嘛, 只靠牙肉去磨食物!! 真令媽媽頭痛 @@
2014年1月24日 星期五
15個月
好耐冇寫blog, 又黎更新吓囡囡近況先。
食物方面: 未能吃到軟飯, 嘗試煮BB通心粉俾囡囡吃, 但係就咁吞落去, 唔會咬, 好似仍然食梗 BB 粥咁, 食多幾匙仲作嘔o添, 激死!! 唯有張d粥煲杰d..... 唉, 慢慢黎!! 口乾識得自己攞杯飲水!!
試過新食物: 紅衫魚, 馬友, 番茄, 牛油果, 芝士, 橙, 鷹咀豆, 紅腰豆, 上星期六煲粥仲試咗落少少橄欖油!!
行為方面: 仲未識行!! 成日e e r r 講太空話!! 只識講”爸爸”, “媽媽”, “包包”!! 成日喜歡挑戰我底線!! 最慘成日一興奮就打或抓人塊面!! 驚時會識得拍心口!! 開始識得互動, 例如”俾媽媽”, 去公園問“見唔見到魚魚呀”, 會即刻俾同望!! 聽到喜歡, 熟悉既歌仔會拍手踢腳, 好攪笑!! 玩煮飯仔, 仍會將d假食物放入口!! 噚晚仲好曵咁嘗試爬梳化!! 開始識得揭書, 唔係搣書!!
認知方面: 能分辨頭, 眼, 鼻, 口, 膊頭!! 話去街, 自己識得嘗試套襪仔落腳!! 又一攪笑動作!!
(其實影咗好多相, 但要上載真的很慢)
訂閱：
文章 (Atom)