又一個週六的晚餐

叫咗屋企人上黎食飯，四餸，總共一百四十四個大洋，五大一B，爸爸就出咗街約人食飯，我都可以做到食平 D ！雖然唔係D乜野好餸，不過勝在多菜少肉，少油少鹽，健康D，飯後再有雪糕做甜品 ^ ^

1) 白灼海蝦 $60，買時仲游緊水，所以隻隻都好新鮮，好甜，肉質很有彈性，很爽口

2) 涼拌黑木耳四季豆 $13

3) 雞脾菇炒椰菜 $16

4) 煎香草雞鎚 $55

一人晚餐

每個星期五都可以享受幾個鐘頭既自由，由於今晚爸爸要夜少少先放工，所以我就煮咗一餐飯俾自己食喇.....菜式有雞蛋炒飯及蝦醬炒椰菜，蝦醬除咗煮通菜之外，原來煮其他菜都好夾架 ^ ^

週日午餐

今日爸爸要返工，所以媽媽用星期六晚招待公公、婆婆用唔晒既食材係屋企煮咗簡單既午餐俾我食。食飽飽之後本來我都唔肯瞓覺豬，想即刻去廸士尼，但媽媽話咁早去都冇用，第一爸爸都未放工、第二媽媽話預約咗要夜晚先可以睇"金裝米尼"表演，所以係我不情願既狀態下被媽媽暗我瞓咗1小時又半個鐘既覺豬。瞓醒媽媽俾咗芒果我食做下午茶點，跟住就好開心約埋爸爸出發去廸士尼喇...... 仲睇埋放煙花先返屋企。

花園餐廳

好耐冇去花園餐廳食飯，今日去咗北角閒逛，路經此餐廳又咁啱到食飯時間，所以二話不說就上咗去。花園餐廳原來英文係 Sweetheart Garden ^ ^

週六晚餐

去街市見到海鮮檔 D 食材好新鮮又平，所以買了二十元花甲煮勝瓜，夏天盛產既蔬菜之一，同場加埋粒粒薯仔炒豬肉。亞女好鍾意食，可能薯仔粒加咗少少咖喱粉落去煮，所以好惹味
 ^ ^