冬菇亭

每逢星期五就係我最期待既日子, 因為逢星期五夜晚女女都會留係婆婆家多兩至三個鐘, 待吃完晚飯我先接佢走, 咁我每個星期就有兩至三個鐘既自由時間可以放咗工行吓街, 睇吓野喇 ^ ^


上個星期五就去咗一個冬菇亭度食小炒, 呢個冬菇亭我每日上下班搭車都會見到, 已經想試好耐, 唔食還可以, 仲可以充滿想像空間, 食咗就慨嘆中伏, 入到去坐低老公話食小炒既地方貢小人都唔慌好野, 但我真係想試好耐, 咁就叫咗以下三個餸加兩碗靚仔, 埋單二百三十幾, 冇鍋氣之餘仲食唔飽, 我知, 宜加物價貴吖嘛, 但你係冬菇亭喎, 我相信你既租金應該唔會好貴啩!!  食完仲要過隔離麥當當食雪糕新地同紅豆批先至剛剛夠飽 @@


(1) 黑椒炒牛柳

 

(2) 菜芯炒鮮魷

 

(3) 韭菜豬紅

27個月

好耐冇寫, 又黎更新吓先!!  不經不覺女女已兩歲有多, 黎近九月幼稚園K1開學喇..... 媽媽好期待妳正式踏入人生第一個學生旅程哦 ^ ^


進入兩歲後, 女女真係曵咗好多, 踏入第一個反叛期 - Trouble Two, 真係反叛到不得了, 叫佢唔好做既野就特登去做, 試大人底線, 頭痛!!  每日朝早由起身換片至可以踏出門口返婆婆家都要拉鋸至少半個鐘, 明明10 至 15分鐘可以完成既例行程序唔明點解要如此耐 @@


其他方面如自己進食都好好, 講野已經可以講到簡單句子, 一個動詞加一個名稱。開始識得使用代名詞 : 我 / 你。每次去公園玩都好鍾意跟住D大過佢既哥哥, 姐姐跑, 人地都唔識佢, 係都要跟住人, 人地笑, 佢又笑!!  偶然遇到D好既哥哥, 姐姐就會話妹妹俾你玩或一齊玩, 有D就唔理佢, 唔好既就有D會叫佢走開 :(


戒片方面或者黎近既夏天會試吓, 看看能否成功!!  大致上各方面都跟得上健康院定下二至三歲小孩應有既標準 ^ ^